Усё хлусня, ад пачатку да канца

• Наталля Радзіна
• 23.03.2024, 15:55

Паліна Шарэнда-Панасюк застанецца гераіняй, а прапагандыстаў чакае пакаранне.

Беларуская тэлевізія паказала прапагандысцкі пастановачны фільм з удзелам палітзняволенай, актывісткі грамадзянскай кампаніі «Еўрапейская Беларусь» Паліны Шарэнды-Панасюк, якая ўжо чацвёрты год знаходзіцца ў зняволенні ва ўмовах катаванняў і ціску. Галоўная рэдактарка сайта Charter97.org Наталля Радзіна адрэагавала на яго ў «Фэйсбуку»:

– Агідны і подлы пастановачны фільм быў паказаны ўчора на БТ пра актывістку грамадзянскай кампаніі «Еўрапейская Беларусь» Паліну Шарэнду-Панасюк. Усё хлусня, ад пачатку да канца. Паліну вадзілі па пустой калоніі, у кадры, акрамя яе і прапагандыстаў БТ, нікога не было. Паказаныя памяшканні пасля свежага рамонту відавочна не жылыя. Цалкам відавочна, што змучаную катаваннямі палітзняволеную прымусілі гаварыць загадзя напісаны тэкст. Да фільма яе старанна рыхтавалі: апранулі ў новую форму, зрабілі макіяж, верагодна, перавялі напярэдадні на ўзмоцненае харчаванне. Хоць усім, хто добра ведае Паліну, усё роўна было відаць, наколькі яна змучаная катаржнымі ўмовамі ўтрымання і сталым знаходжаннем у ШІЗА.

Асобна хачу адзначыць прапагандыстку БТ Насту Бенедзісюк, якая рабіла «інтэрв'ю» з Палінай. Якой трэба быць скончанай сукай і садысткай, каб паказваць маці відэа з сынам, якога яна не бачыла больш за тры гады, з каментаром, што «дзеці забываюць маму»?

Лукашысцкія прапагандысты са сваімі лагернымі пастаноўкамі – суўдзельнікі катаванняў супраць палітзняволеных і злачынстваў, якія здзяйсняюцца рэжымам. Яны немінуча панясуць адказнасць. А Паліна Шарэнда-Панасюк застаецца гераічнай жанчынай, якая прайшла праз пякельную гулагаўскую сістэму, змагалася з ёй усімі сіламі, спрабуючы захаваць годнасць і веру ў свае ідэалы.

Знакаміты савецкі дысідэнт Натан Шчаранскі за 9 гадоў зняволення правёў у катавальных умовах ШІЗА 405 дзён, і гэта быў ягоны абсалютны рэкорд. Расейскі палітвязень Аляксей Навальны быў у ШІЗА 300 дзён. Паліна Шарэнда-Панасюк толькі за апошні год зняволення правяла ў ШІЗА 230 дзён.

Гэтая моцная, мужная жанчына вартая толькі бязмежнай павагі і захаплення.

Вельмі чакаем на свабодзе, Паліна.