Туск: У нас ёсць сігналы, што Лукашэнка зноў хоча выкарыстоўваць міграцыйнае пытанне

• 11.04.2024, 19:56

Прэм'ер-міністр Польшчы заявіў аб узмацненні межаў.

Прэм'ер-міністр Польшчы Дональд Туск сустрэўся ў чацвер з прэм'ер-міністрам Эстоніі Каяй Калас. Пазней яны разам з'явіліся на прэс-канферэнцыі, паведамляе TVN24.

Туск паведаміў, што тэмы перамоваў уключалі пытанні бяспекі, у тым ліку вайну ва Украіне, а таксама пытанне нелегальнай міграцыі.

- Мы дамовіліся, што нашай агульнай задачай будзе мабілізаваць і матываваць усіх партнёраў у Еўропе для надання максімальна інтэнсіўнай і эфектыўнай дапамогі ў ваенных намаганнях Украіны супраць расейскай агрэсіі, - заявіў прэм'ер-міністр Польшчы.

Дональд Туск таксама ўзняў пытанне нелегальных мігрантаў, якіх рэжым Лукашэнкі выкарыстоўвае для ціску на Польшчу.

- У нас з'яўляецца ўсё больш сігналаў аб тым, што рэжым Лукашэнкі зноў хоча выкарыстоўваць пытанні міграцыі і ціску на нашу ўсходнюю мяжу з Беларуссю для дасягнення палітычных мэт, дэзінтэграцыі, дэстабілізацыі, а таксама для ўласнага псеўдадзяржаўнага бізнэсу, - сказаў прэм'ер-міністр Польшчы.

Са слоў польскага прэм'ера, Варшава ў каардынацыі з ЕЗ мае намер узмацніць барацьбу з нелегальнай міграцыяй.

- Менавіта таму я сказаў прэм'ер-міністру, што сёння вечарам і ва ўсе часы, у тым ліку і пасля наступнага еўрапейскага раунда, буду тлумачыць і пераконваць усіх нашых еўрапейскіх партнёраў ставіцца да нелегальнай міграцыі як да рэальнага прыярытэту, - дадаў ён. - Каб увесь Еўразвяз - не толькі Польшча - прызнаў неабходнасць абароны нашай тэрыторыі, абароны мяжы і кантролю мяжы ў якасці еўрапейскага прыярытэту, - сказаў кіраўнік урада Польшчы.

Ён дадаў, што старшынства Польшчы ў Радзе ЕЗ, якое пачнецца 1 студзеня 2025 года, будзе прысвечанае бяспецы ў шырокім разуменні.

Як паведамляў Charter97.org, напярэдадні больш за 220 нелегалаў з лесвіцамі штурмавалі мяжу Беларусі і Польшчы.