На Салігорскім вадасховішчы выратавалі лася

• 11.04.2024, 20:13

Відэа.

Супрацоўнікі выратавальнай станцыі ТТВОД у Салігорску раніцай у чацвер, 11 красавіка, знайшлі на паверхні Салігорскага вадасховішча незвычайнага плыўца – лася, які, здавалася, цалкам выбіўся з сілаў. Падрабязнасці выратавання прыводзіць «Электронны Салігорск».

Звер страціў арыентацыю ў прасторы на прасторнай воднай роўнядзі, сыходзіў пад ваду з галавой і кружыў. Шанцаў дабрацца да берагу без дапамогі ў яго не заставалася.

Супрацоўнікі ТТВОД аператыўна выйшлі на катары, каб прадухіліць гібель лася. Падабраўшыся бліжэй да выматанай жывёлы, ратавальнікі пачалі накіроўваць яе ў бок берагу.

Адчуўшы пад капытамі цвёрды грунт, лось у спешным парадку накіраваўся ў гушчар лесу.