Bild: Украіна змагла скапіяваць расейскія «Ланцэты»

• 11.04.2024, 21:49

УСУ б'юць імі па акупантах.

Украінскія вайскоўцы змаглі распрацаваць і паспяхова апрабаваць дроны-камікадзэ, падобныя да расейскіх «Ланцэтаў».

Пра гэта паведамляе Bild.

Як піша выданне, украінскі беспілотнік з'яўляецца амаль ідэнтычнай копіяй расейскага «Ланцэта».

У яго ёсць сістэма ўзбраення «Ram X», распрацаваная ўкраінскай кампаніяй CDET. Гэтая кампанія вядомая тым, што ўжо выпусціла на рынак два іншыя паспяховыя беспілотнікі-камікадзэ сярэдняй далёкасці – «Ram 1» і «Ram 2».

Аднак менавіта Ram X мае ўнікальную форму і характэрныя восем крылаў, як у расейскага дрона.

Сярод іншага выданне звяртае ўвагу на тое, што на днях Служба бяспекі Украіны апублікавала відэа з серыяй нападаў беспілотнікаў на расейскія сістэмы супрацьпаветранай абароны. Дроны на гэтым відэа маюць «почырк» звышсучаснага «Ram X» або «Укра-Ланцет».

Тое, што на кадрах паказаная параза толькі расейскіх сістэмаў СПА, сведчыць, што атакі адбываліся на адлегласці ад 10 да 30 кіламетраў на лініі фронту. А вось на высокую дакладнасць украінскіх дронаў паказвае, што падчас нападаў расейская тэхніка рухалася.

Таксама на відэа відаць, што падчас атакі ўкраінскія байцы маглі ўвесь час карэктаваць палёт дрона – гэта яшчэ адно сведчанне зусім новай тэхнікі.

Усё гэта сведчыць, што Украіна, як і было абвешчана некалькі месяцаў таму, здолела не толькі скапіяваць магутную зброю Расеі, але і наладзіць яе серыйную вытворчасць.

У канцы лютага гэтага года міністр лічбавізацыі Украіны Міхаіл Фёдараў расказаў, што за некалькі месяцаў Сілы абароны атрымаюць сотні дронаў-камікадзэ, распрацаваных Украінай паводле тыпу расейскіх «Ланцэтаў».