«Калі ўспорацца на люстэрка, не можа паверыць, што яго давялі да такога стану»
- 12.04.2024, 11:08
Што вядома пра Рыгора Кастусёва ў турме.
Старшыня партыі БНФ Рыгор Кастусёў ужо тры гады знаходзіцца ў зняволенні. За гэты час у яго моцна пагоршылася здароўе, выяўлена анкалагічнае захворванне, а ўмовы ўтрымання змяніліся з жорсткіх на невыносныя. Што зараз вядома пра стан палітвязня, «Белсату» расказаў ягоны зяць Зміцер Антончык.
Дзмітрый Антончык расказаў, што сувязі з Кастусёвым амаль няма: лісты ад яго даходзяць толькі жонцы і адной дачцэ, і тое нерэгулярна. Самаму палітвязню лісты ад сваякоў не даходзяць ці даходзяць з вялікай затрымкай. Адзінае кароткатэрміновае спатканне ён атрымаў адразу пасля суда. Цяпер Кастусёў знаходзіцца на турэмным рэжыме.
Са слоў зяця, яшчэ да затрымання было вядома аб праблемах Кастусёва са здароўем, з прастатай. У яго алергія на некаторыя прадукты і на палын, яшчэ на волі ён меў даволі моцны варыкоз на нагах. Аб анкалагічнай хваробе тады размоў не вялося - хутчэй за ўсё, яе на той момант не было, мяркуе суразмоўца.
Праблемы са здароўем у Кастусёва пагоршыліся ў СІЗА: ён перанёс за кратамі інфаркт і перахварэў на ковіды. На думку Антончыка, сваю ролю ў гэтым адыгралі не толькі бесчалавечныя ўмовы ўтрымання, але і стрэс.
У пачатку красавіка стала вядома, што Кастусёву зрабілі аперацыю, вывелі катэтар з мачавога пухіра. Знаёмыя медыкі распавялі зяцю палітвязня, што такое ўмяшанне выконваюць пры пагрозе што мачавы пухір не вытрымае і лопне. Але ад аперацыі раілі ўстрымлівацца да апошняга, бо пасля чалавек фактычна застаецца інвалідам.
Сам Кастусёў расказваў у лістах, што апошнім часам не мог спаць, бо кожную гадзіну павінен быў падымацца, хаця знаходзіўся ў цяжкім фізічным і псіхалагічным стане. Аналізы крыві паказвалі перавышэнне пэўных параметраў у 2,5 разы вышэй за норму.
- Наогул ён піша, што калі выпадкова натрапіць на люстэрка, не можа паверыць, што яго давялі да такога стану. Вельмі пастарэў, змарнеў... Цяжка! — расказвае Антончык.
Нагадаем, нядаўна экспэрты ААН у правах чалавека выказалі занепакоенасць у сувязі з паведамленнямі аб крытычным стане здароўя і жорсткім абыходжанні з палітвязнем, які адбывае 10-гадовы тэрмін паводле справы аб «дзяржаўным перавароце». Адмову ў меддапамозе яму прыраўнялі да катавання.
Экспэрты заклікалі беларускія ўлады разгледзець пытанне аб памілаванні, змякчэнні пакарання для Кастусёва або замене зняволення альтэрнатыўнай формай пазбаўлення волі.
Раней Рыгор Кастусёў скардзіўся на дрэннае самаадчуванне. У няволі ў палітыка абвастрыліся праблемы са здароўем - у яго анкалагічнае захворванне.
У жніўні мінулага года Кастусёў прайшоў анкалагічнае даследаванне, аднак прынамсі да восені яму не паведамлялі аб выніках. Пры гэтым палітыка некалькі разоў адпраўлялі ў ШІЗА і ПКТ.
17 красавіка Кастусёву споўніцца 67 гадоў.