Forbes: РФ да сярэдзіны 2025 года вычарпае запасы старых танкаў і баявых машын

• 12.04.2024, 14:38

Тэхніку немагчыма замяніць новай вытворчасцю.

Расея для вядзення вайны супраць Украіны выкарыстоўвае старую тэхніку. Але да сярэдзіны 2025 года на расейскіх складах можа не застацца старых танкаў і баявых машын.

Пра гэта паведамляе Forbes.

Як адзначаецца, Крэмль папаўняе страты расейскага войска ва Украіне старымі запасамі тэхнікі. Гаворка ідзе аб баявых машынах 1970-х гадоў, а ў некаторых выпадках нават 60-х ці 50-х гадоў.

Выданне дадае, што гэтая тэхніка - абмежаваны рэсурс, яе немагчыма замяніць новай вытворчасцю.

Эстонскі вайсковец і аналітык Артур Рэхі мяркуе, што да сярэдзіны 2025 года на расейскіх складах не застанецца старых танкаў і баявых машын. На думку аналітыка, час Расеі заканчваецца.

Пры гэтым выданне адзначае, што расейскае войска ўсё яшчэ абапіраецца на масавасць войскаў, нягледзячы на тое, што нясе страты.

Амерыканскі генерал Крыстафер Кавалі падкрэсліў, што войска РФ зараз фактычна большае на 15%, чым у пачатку поўнамаштабнага ўварвання ва Украіну. З яго слоў, за мінулы год Расея павялічыла колькасць сваіх войскаў на перадавой з 360 да 470 тысяч.

Страты расейскіх войскаў

Мінабароны РФ хавае страты акупацыйных войскаў ва Украіне. Пры гэтым пуцінскі рэжым увесь час хлусіць аб стратах украінскіх сіл.

Генштаб УСУ паведамляе, што Расея страціла на вайне ўжо больш за 450 тысяч салдат. Толькі за апошні дзень украінскія воіны ліквідавалі 840 расейцаў.

Брытанская выведка паведамляла, што Расея набірае штомесяц у войска блізу 30 тысяч новых салдат. Гэта дазваляе ёй працягваць весці захопніцкую вайну супраць Украіны.

Пры гэтым расейскія апазіцыйныя СМІ заявілі, што з пачаткам наступу РФ на фронце страты акупацыйных войскаў значна выраслі.