У Фаніпалі мужчына пайшоў з 5-гадовым сынам на шпацыр, а вярнуўся п'яны і без дзіцяці

• 23.04.2024, 9:45

Што было далей.

У Фаніпалі 34-гадовы мужчына адправіўся з сынам на шпацыр, а дадому вярнуўся п'яны і без дзіцяці. Падрабязнасці інцыдэнту паведамляе zerkalo.io са спасылкай на набліжаны да МУС тэлеграм-канал.

Дома п'янага жыхара Фаніпаля сустрэлі бацькі. Яны спрабавалі высветліць, дзе іх унук. Выніку гэта не прынесла, пенсіянеры кінуліся шукаць дзіця самастойна. Іх пошукі не мелі поспеху — яны звярнуліся ў міліцыю. Хлопчыка аператыўна знайшлі.

А ўжо пазней высветлілася, што мужчына сустрэў на вуліцы знаёмага. Яны выпілі і бацька дзіцяці заснуў проста на лавачцы каля пад'езда. Калі дзіця не змагло абудзіць яго, то адправілася следам за таварышам бацькі да яго дадому. Супрацоўнікі знайшлі малога менавіта там.