«За гэтым стаіць пуцінскі рэжым»
- 24.04.2024, 15:47
Апазіцыянер з Узбекістана расказаў, што адбываецца ў ягонай краіне і рэгіёне.
За маштабнымі крывавымі канфліктамі ў Цэнтральнай Азіі стаіць пуцінскі рэжым. Як паведамляе карэспандэнт Charter97.org, такую заяву зрабіў апазіцыйны палітык, кіраўнік руху «Erkin O'zbekiston» (Свабодны Узбекістан) Хасанбой Бурханаў на канферэнцыі АБСЕ «Роля грамадзянскай супольнасці ў прасоўванні і абароне міжнароднага права правоў чалавека і міжнароднага гуманітарнага права», якая прайшла 22 -23 красавіка ў Вене.
Палітык звярнуў увагу на шэраг канфліктаў у Цэнтральнай Азіі, якія Крэмль мог выкарыстоўваць для расхіствання сітуацыі ў рэгіёне. У траўні 2005-га года ў Андыжане адбыўся масавы расстрэл пратэстоўцаў. З афіцыйных звестак, падчас сутыкненняў загінулі 187 чалавек, з неафіцыйных - да некалькіх тысяч. У чэрвені 2010-га года на поўдні Кыргызстана ўспыхнулі стыхійныя міжэтнічныя сутыкненні паміж кіргізамі і ўзбекамі, у выніку якіх, паводле розных звестак, загінула больш за 2000 чалавек. Таксама палітык у сваёй прамове згадаў пратэсты ў Каракалпакстане ў ліпені 2022-га года, калі з афіцыйных звестак загінула 18 чалавек, 243 атрымалі раненні.
- Дагэтуль няма адказу на пытанне, хто з'яўляецца сапраўдным арганізатарам гэтых трагедый. Але калі мы адкажам на пытанне, каму гэта было выгадна, стане зразумела, што за гэтымі крывавымі злачынствамі стаіць пуцінскі рэжым. На працягу другога дзесяцігоддзя пуцінскі рэжым мэтанакіравана ідзе да адраджэння СССР 2, толькі ў горшым варыянце, - заявіў Бурханаў.
Палітык заклікаў дзяржавы-ўдзельніцы АБСЕ як мага хутчэй выдаць той аб'ём вайсковай дапамогі Украіне, у якім яна мае патрэбу цяпер:
- Бяспека Еўразвязу залежыць ад ходу вайны ва Украіне. Калі пуцінскі рэжым акупуе Украіну, ён створыць вялікую праблему не толькі для Еўразвязу, але і для ўсяго цывілізаванага свету.
У сваёй прамове Бурханаў асобна згадаў рэпрэсіі з боку рэжыму Шаўката Мірзіеева і заявіў, што ўзбекскія ўлады працягваюць прымяняць тактыку запалохвання і транснацыянальных рэпрэсій за мяжой у дачыненні да сваіх палітычных апанентаў. Удзельнікам канферэнцыі быў дадзены даклад аб рэпрэсіях ва Узбекістане, з якім можна пазнаёміцца праз спасылку.