У Польшчы для беларусаў могуць спрасціць пацвярджэнне атэстатаў аб адукацыі

• 16.05.2024, 10:07

Законапраект ужо прыняты Сэймам.

Беларусы, а таксама іх сямейнікі змогуць пацвердзіць свае атэстаты аб сярэдняй адукацыі проста ў Польшчы - у рамках мясцовай адміністрацыйнай працэдуры. Рэкамендаваная папраўка ў закон аб адукацыі прынятая ў рамках змяненняў у іншы закон - аб дапамозе грамадзянам Украіны ў сувязі з узброеным канфліктам. Змяненні напярэдадні зацвердзіў Сэйм Польшчы.

Папраўка, якая тычыцца прызнання атэстатаў аб адукацыі, абвяшчае, што грамадзяне краін, якія спынілі дзеянне пагадненняў з Польшчай аб прызнанні дакументаў аб адукацыі, змогуць пацвердзіць атрыманне адукацыі, а таксама права на працяг вучобы, у тым ліку ў ВНУ, у рамках адміністрацыйнай працэдуры ў Польшчы. Беларусь прыпыніла пагадненне з Польшчай аб супрацоўніцтве ў сферы адукацыі яшчэ летась у лютым.

Як пісаў PAP, раней намесніца міністра адукацыі Польшчы Ёана Муха казала, што ўнясенне гэтай папраўкі звязана з тым, што Беларусь перастала выдаваць сваім грамадзянам даведкі аб пацвярджэнні атэстата. У выніку беларусы сутыкнуліся са складанасцямі пры прадаўжэнні адукацыі. Прадстаўляючы папраўку ў Сэйме, Муха адзначыла, што гэта датычыцца блізу 5 тысяч беларускіх грамадзян.

Законапраект аб дапамозе ўкраінцам, прыняты Сэймам, яшчэ павінны падтрымаць Сенат і падпісаць прэзідэнт Польшчы.