У цэнтры Менска прадаюць кватэру «з парыжскім шыкам»

• 19.05.2024, 16:45

Як выглядае і колькі каштуе.

У базе Realt з'явілася нестандартная кватэра з мансардай у цэнтры горада. У гэтай еўрадвушцы добры рамонт, а капрамонт у доме 1938 года пабудовы зрабілі летась. У абвестцы гэты варыянт называюць «кватэрай з парыжскім шыкам».

Гэта дом 1938 пабудовы. У 2003 годзе яго рэканструявалі, а ў 2023 зрабілі капрамонт. Адрас – Захарава, 29. Побач – парк Горкага і плошча Перамогі. Спакойным крокам шпацыр зойме 5-10 хвілін.

Кватэра знаходзіцца на пятым паверсе, яна мансардная. З акна адкрываецца краявід на зялёны двор.

Агульная плошча – 76 квадратаў, жылых з іх 54. Гэта еўрадвушка з агульнай гасцёўняй і кухняй і асобнай спальняй. Каля ўваходу арганізавана зручная шафа для захоўвання – у ёй ёсць месца і для верхняга адзення, і для бытавых рэчаў накшталт сушылкі для бялізны ці пыласоса.

У гасцёўне, сумешчанай з кухняй, стаіць вялікі абедзенны стол і канапа. Ёсць тэлевізар і вялікая шафа. А пад скошаным мансардным дахам арганізавана працоўнае месца.

У кухні з тэхнікі ёсць пасудамыйка, варачная панэль, духавая шафа, выцяжка і лядоўня.

У кухні-гасцёўні тры вялікія вокны з драўлянымі шклопакетамі і падваконнікамі. Ёсць дадатковыя вокны і ў скошанай столі. А яшчэ невялікае акенца паміж пакоямі.

Спальня выглядае атмасфернай праз тую ж мансардную столь з акенцам. Тут стаіць двухспальны ложак.

Санвузел сумешчаны. Ёсць і душавая, і ванна – яна аформлена незвычайнымі драўлянымі рэйкамі. Пральная машына схавана за шторай, побач ёсць паліцы для захоўвання рэчаў. Яшчэ ў санвузле ёсць акно.

Каштуе кватэра 185 тысяч даляраў. Метр выходзіць 2431 даляр.