Афіцэр: Беларускія вайскоўцы не ўмеюць змагацца з дронамі

• 21.05.2024, 14:55

НПЗ безабаронныя.

Чытач сайта Charter97.org расказаў, што ў апошнія некалькі дзён адзначаецца актыўнасць лукашэнкаўскіх сілавікоў у Рэчыцкім раёне. На ўзмоцненае патруляванне вывелі тэрытарыяльную абарону, раённую і абласную міліцыю, АМАП.

Лукашысты заняліся аховай радовішчаў нафты. Пад узмоцненай аховай і Мазырскі НПЗ.

Ці змогуць такія меры абараніць беларускія НПЗ і нафтабазы ад магчымага нападу дронаў? Пра гэта сайт Charter97.org на ўмовах ананімнасці паразмаўляў з беларускім афіцэрам:

- Хачу згадаць гісторыю з плюшавым дэсантам, калі швэды на лёгкаматорным самалёце спакойна абышлі беларускую сістэму СПА. У мяне ёсць вялікія сумневы ў здольнасці нашай СПА рэагаваць на сур'ёзныя пагрозы.

Што тычыцца дронаў, у нас няма эфектыўнага досведу барацьбы. Гэта вайна новага пакалення. Мы не ведаем выпадкаў, калі беларускія вайскоўцы эфектыўна супрацьстаялі БПЛА.

Была гісторыя з атакай на расейскі самалёт А-50 у Мачулішчах. Перашкодзіць гэтай дыверсіі нашы вайскоўцы, якія ахоўвалі аэрадром, не змаглі.

Давайце паглядзім на ўкраінскія атакі па расейскіх аб'ектах. Там камбінаваныя, шматузроўневыя налёты, у якіх бяруць удзел ужо больш за сотню БПЛА адначасова. Ва УСУ велізарны досвед такіх аперацый. У нашай жа абароны - ніякага. А мы маем справу з нафтаперапрацоўкай. Маленькі дрон з выбухоўкай - НПЗ няма.

Дарэчы, гісторыя з Мачулішчамі паказала, што такі дрон можа прыляцець не з тэрыторыі Украіны, што зробіць атаку яшчэ больш эфектыўнай.

Акрамя таго, Мазырскі НПЗ знаходзіцца ў зоне дасяжнасці ўмоўных "Точак-У". Сёння ва Украіны ёсць амерыканскія ракеты ATACMS. Так, ЗША забараняюць выкарыстоўваць гэтую зброю па-за ўкраінскай тэрыторыяй. Уявім, што такая забарона знятая.

Амерыканскія ракеты з лёгкасцю абыходзяць расейскую СПА. Мы гэта ўжо бачым у Крыме. Думаю, з такімі ракетамі можна замахнуцца на больш амбіцыйныя цэлі, чым НПЗ, які знаходзіцца проста на мяжы. Тыя ж самыя цэнтры прыняцця пастаноў.