У Беларусі звольнілі кіраўніцу, якая «пераплюнула» Лукашэнку

• 24.05.2024, 10:05

Падрабязнасці.

У харэаграфічным ансамблі «Харошкі» змянілася кіраўніцтва. Мастацкім кіраўніком калектыву стала Ірына Грушава, напісала прапагандысцкае выданне «СБ. Беларусь сегодня». Ейнае прозвішча таксама з'явілася на сайце калектыву.

Грушава — артыстка балета вышэйшай катэгорыі, у «Харошках» працуе амаль чвэрць стагоддзя.

Новае прызначэнне азначае, што сваёй пасады пазбавілася Валянціна Гаявая, якая была мастацкай кіраўніцай з моманту стварэння калектыву, адзначае zerkalo.io.

50 гадоў таму, у студзені 1974 года, у Менску пры Белдзяржфілармоніі пачаў работу ансамбль «Харошкі». Яго стваральнікамі сталі харэографы Валянціна Гаявая і Мікалай Дудчанка. Першая з іх дагэтуль заставалася нязменнай мастацкай кіраўніцай ансамбля.

Валянціне Гаявой сёлета споўніцца 88 гадоў. Яна стала кіраўніцай на 20 гадоў раней, чым да ўлады ў Беларусі прыйшоў Аляксандр Лукашэнка.