Расея страціла элітныя войскі пад Часавым Ярам
- 30.05.2024, 8:29
Вайсковец 41-й брыгады УСУ раскрыў падрабязнасці.
Расейскае акупацыйнае войска страціла пад Часавым Ярам 98-й дэсантную дывізію, якая была адным з самых цяжкіх ваенізаваных фармаванняў Масквы. Аднак з адводам гэтай дывізіі лягчэй у Часавым Яры не стала. Больш падрабязна аб сітуацыі ў горадзе і яго наваколлях у эфіры Апостраф TV распавёў вайсковец 41 брыгады УСУ Кірыл Сазонаў.
- Якая аператыўная сітуацыя каля Часова Яра? Як змянілася абстаноўка пасля адкрыцця Харкаўскага фронту?
- Вораг не аслабляе ціск і працягвае штурмаваць Часаў Яр. Ён спрабуе захапіць горад і гэта не сакрэт. Мэтай Пуціна так і застаецца акупацыя ўсёй Данецкай вобласці. А Часаў Яр - гэта, першым чынам, шлях да Канстанцінаўкі. А далей побач Дружкаўка, Краматорск і Славянск.
Апошнім часам вораг некалькі разоў штурмаваў горад. Штурмы працягваліся паўтара-два дні і мы нанеслі ворагу вялікія страты. Вельмі актыўна працавалі нашыя “Грады” і артылерыя. Гэтак жа вельмі шчыльна працуюць дроны з 41 брыгады і нашы мінамётчыкі. І ў выніку мы бачым, што ўся 98-я дэсантная дывізія адыходзіць ад Часавага Яра на даўкамплектаванне. А гэта быў самы цяжкі супраціўнік - экіпіраваная, падрыхтаваная дэсантура, у склад якой уваходзілі маладыя трэніраваныя кантрактнікі. Гэта быў вельмі цяжкі супраціўнік і ён скончыўся.
Цяпер мы бачым перагрупоўку ў ворага, нейкую ратацыю. Яны падцягваюць нейкія рэзэрвы. І абстрэлаў не стала менш. Па нас працуюць ракеты, артылерыя, касетныя "Смерчы", "Ураганы" і "Грады". Яны перыядычна спрабуюць штурмаваць з тэхнікай. Выкарыстоўваюць то змешаныя механізаваныя штурмы, то маленькія групы, то яны спрабуюць браць Часаў Яр у ціскі, наступаючы па флангах.
Днямі DeepState пісаў, што яны крыху прасунуліся ўздоўж трасы па полі. Але гэта ні пра што і мы іх можам тамака сцерці ў кожны момант.
Цяжэйшая сітуацыя на паўночным флангу. Тамака яны таксама душаць, лезуць па руінах былых лецішчаў. Але за апошнія два дні там ніякага пасоўвання няма.
Нашы танкі таксама выходзяць на перадавую адпрацоўваюць і адыходзяць. Для разумення, калі наш танк выйшаў адпрацаваць пад прыкрыццём мінамётчыкаў, то шэсць FPV па ім патрапілі. Танк гарэў, але адпрацаваў па варожых пазіцыях і вярнуўся. Я ўчора размаўляў з экіпажам - усе трое хлопцаў жывыя. Камандзір танка атрымаў апёкі далоняў і быў шпіталізаваны.
Увогуле, Часаў Яр трымаецца моцна. 41 брыгаду сюды перакінулі ў канцы сакавіка з Купянскага кірунку. Тады нам казалі, што тыдзень-два і ў красавіку Часаў Яр будзе пакінуты. Але ўжо заканчваецца травень, і мы трымаемся. І ў Часаў Яр расейцы да гэтага часу не зайшлі.
- Чаму наваколлі мікрараёна Канал з'яўляюцца адным з самых складаных участкаў і наколькі актыўна супраціўнік спрабуе прасоўвацца ў гэтым раёне?
- Гэта тычыцца не толькі канала, але і наогул усіх адцінкаў, дзе вораг можа выйсці да Часавага Яру. Вораг спрабуе ўчапіцца за ўсе пабудовы. Бо мае перавагу ў колькасці асабовага складу.
Але калі гэтая навала ідзе па полі або лесе, то якая б колькасць людзей ні была, колькі б тэхнікі не было - артылерыя іх проста знішчае. А вось калі вораг уваходзіць у горад і навязвае вулічныя баі, тады колькасная перавага ворага дае пра сябе ведаць. І артылерыі па горадзе працаваць ужо не так добра. Таму расейцы спрабуюць зачапіцца за што хочаш, каб зайсці ў Часаў Яр.
У нас задача - не пускаць іх у Часаў Яр наогул. Часам групы ў абыход прарываліся ў Часаў Яр, заходзілі ў горад. Але ў нас тут вялікі прыпынак, і ходзіць экспрэс, як мы жартуем, на канцэрты Кабзона. Гэта ўжо шоў-бізнэс з білетамі ў адзін канец.
І нават калі яны прасоўваюцца ў мікрараён Канал, то далей натуральная перашкода - гэта сам канал Северскі Данец - Данбас. Цяпер там вады менш, чым па калена, але цяжкая тэхніка яго прайсці не можа. Яна павінна спыніцца, каб хаця б высадзіць дэсант. І ў гэты час яна вельмі ўразлівая.
Часам вораг спрабуе перасекчы канал побач з горадам, але гэта ім таксама не ўдаецца.
- Цяпер разгарнулася шырокая дыскусія аб пытанні, ці дазваляць Украіне біць заходняй зброяй па акупантах на іх тэрыторыі. І аглядальнікі кажуць пра тое, што калі б у нас быў гэты дазвол, пакуль не адкрыўся Харкаўскі фронт, то мы б не дазволілі ворагу адкрыць яго. Што б змяніла, калі б мы мелі гэты дазвол у кірунку Часавага Яра?
- Гэта, перш за ўсё, тычыцца Харкаўшчыны, Сумшчыны і Чарнігаўшчыны. Таму што калі збіраецца вялікая групоўка для ўварвання ва Украіну, то некалькі гадзін, калі яны ўжо выйшлі са схованак і гатовыя адпраўляцца на тэрыторыю Украіны - яны вельмі ўразлівыя на сваёй тэрыторыі. І калі ў гэты час нанесці ўдар, то наступу на Харкаўшчыну ўвогуле не было б.
У нас тут крыху іншая сітуацыя, таму што нават калі мы б'ём па іх тыле, гэта акупаваная ўкраінская зямля. Таму нас гэта ўвогуле не тычыцца.
Але калі па межах Украіны на расейскай тэрыторыі знішчаць склады БК, лагістыку, чыгунку - таму што ўся расейская лагістыка падвязаная пад чыгунку - то яны пакоцяцца назад. Без своечасовага забеспячэння паліва, боекамплекта, папаўнення і адвозу параненых і забеспячэння правіянту ваяваць немагчыма. Таму гэта вельмі важна, і мы з аптымізмам чакаем, што неўзабаве атрымаем гэты дазвол.