Reuters: Байдэн падпіша пагадненне аб бяспецы з Украінай на саміце G7

• 13.06.2024, 12:23

У Белым доме заявілі аб важным сігнале для Крамля.

Прэзідэнт ЗША Джо Байдэн падпіша новае пагадненне аб бяспецы з прэзідэнтам Украіны Уладзімірам Зяленскім, у якім паабяцае доўгатэрміновую падтрымку, падчас сустрэчы лідараў «Вялікай сямёркі» ў Італіі.

Пра гэта заявіў дарадца ў нацыянальнай бяспецы Белага дома Джэйк Саліван, паведамляе Reuters.

Пагадненне ясна дасць зразумець, што «наша падтрымка будзе доўжыцца працяглы час і ў будучыні…асабліва ў сферы абароны і бяспекі», - заявіў журналістам на борце Air Force One Саліван.

«Падпісаўшы гэтую дамову, мы таксама пашлем Расеі сігнал аб нашай рашучасці. Калі Уладзімір Пуцін думае, што зможа перажыць кааліцыю, якая падтрымлівае Украіну, ён памыляецца», - сказаў Саліван.

Пятнаццаць краін падпісалі свае ўласныя пагадненні аб бяспецы, якія ўмацуюць «патэнцыял абарончага стрымлівання» Украіны, сказаў ён.

Пагадненне ЗША будзе ўключаць у сябе абавязацельства працаваць з Кангрэсам ЗША над фінансаваннем Украіны ў будучыні, але не будзе змяшчаць абавязацельстваў па выкарыстанні амерыканскіх сіл, дадаў Саліван.

Байдэн адправіўся ў Італію, каб узмацніць ціск на Расею ў сувязі з яе вайной супраць Украіны і на Кітай за яго падтрымку Масквы.