Сербія хоча экстрадаваць у Беларусь рэжысёра Андрэя Гнёта

• 13.06.2024, 14:14

Яго абаронцы рыхтуюць апеляцыю.

Вышэйшы суд Сербіі прыняў пастанову аб экстрадыцыі ў Беларусь рэжысёра і заснавальніка Свабоднага аб'яднання спартоўцаў Андрэя Гнёта.

Падставай для выдачы ў пастанове суда названы міждзяржаўнае пагадненне паміж Сербіяй і Беларуссю ад 3 студзеня 2019 года і Закон аб міжнароднай прававой дапамозе ў крымінальных справах.

Андрэй Гнёт распавёў «Зеркалу», што суд не знайшоў падстаў, якія перашкаджаюць ягонай экстрадыцыі ў Беларусь.

Рэжысёр кажа, што ён і ягоныя абаронцы ўжо пачалі падрыхтоўку апеляцыйнай скаргі на пастанову Вышэйшага суда Сербіі. Да моманту яе разгляду і ўступлення пастановы ў законную сілу рэжысёр будзе працягваць знаходзіцца пад хатнім арыштам.

Гнёт быў затрыманы 30 кастрычніка 2023 года памежнай службай Сербіі пасля прылёту ў сталіцу краіны Бялград, пасля чаго перададзены паліцыі. Прычына затрымання - знаходжанне ў міжнародным вышуку на запыце беларускага бюро Інтэрпола ад 21 верасня 2023 года.