Вялікабрытанія следам за ЗША ўвяла санкцыі супраць Масбіржы

• 13.06.2024, 14:40

Санкцыі маюць на ўвазе замарожванне актываў і абмежаванні ў дачыненні да траставых паслуг.

Урад Вялікабрытаніі абнавіў санкцыйны спіс, дадаўшы ў яго Масбіржу, Нацыянальны клірынгавы цэнтр і Нацыянальны разліковы дэпазітарый, вынікае з дакумента, апублікаванага на афіцыйным партале.

У тлумачэннях гаворыцца, што ўсе тры фінансавыя арганізацыі ўдзельнічалі і працягваюць удзельнічаць у атрыманні выгады і падтрымцы ўрада Расеі шляхам вядзення бізнэсу ў сектары, які мае стратэгічнае значэнне.

Санкцыі, уведзеныя Вялікабрытаніяй, маюць на ўвазе замарожванне актываў і абмежаванні ў дачыненні да траставых паслуг.

Таксама пад санкцыі патрапілі «СПБ Біржа» (яна ўжо знаходзіцца пад санкцыямі Еўразвязу), кампанія «Інгасстрах», авіяперавозчык «Волга-Дняпро», Тамбоўскі парахавы завод і яшчэ некалькі дзясяткаў юрыдычных асоб, сярод якіх ёсць марскія перавозчыкі, хімічныя і машынабудаўнічыя прадпрыемствы, а таксама кампаніі з Кітая і Кыргызстана. Акрамя таго, санкцыі ўведзеныя супраць шасці караблёў, якія маюць дачыненне да «дэстабілізацыі Украіны» або атрымання выгады і падтрымкі ўрада Расеі.

Абмежаванні ўведзены і супраць некалькіх фізічных асоб - у тым ліку, кіраўніка Масбіржы.