Беларуска выйшла з дэкрэту і прызналася, што цяпер працуе «як у тумане»

• 22.06.2024, 15:38

Але праблема зусім не ў страчаных навыках.

Беларуска Юлія вярнулася з трохгадовага дэкрэту на працу і сутыкнулася з цяжкасцямі, якіх не чакала. Пра гэта яна расказала ў TikTok – пад відэа пачалі пакідаць каментары жанчыны, якія таксама прайшлі праз падобны досвед, адзначае «Люстэрка».

У роліку Юлія прызналася, што за тры гады ў дэкрэце яна ні разу не ўключыла камп'ютар.

– І сказаць, што мне цяпер цяжка зноў да ўсяго вяртацца і сядзець цэлы дзень перад маніторам, – гэта проста нічога не сказаць, – заявіла беларуска.

Яна адзначыла, што веды нікуды не падзеліся і «што, куды і як рабіць» на працы ў памяці захавалася.

– Але тое, што расказваюць дзяўчаткі, што пасля дэкрэту адчуваеш сябе як быццам дэградавала, гэта ўсё праўда. Першыя два дні я была ўвогуле як у тумане, – прызналася жанчына.

Але большай цяжкасцю Юлія назвала нават не гэта, а «прывыканне да інтрыг, скандалаў і расследаванняў». Таксама яна дадала тэкстам пад ролікам, што самым складаным было «менавіта сядзець на адным месцы, бо ў дэкрэце прысесці няма калі».

У каментары пад відэа беларускі прыйшлі карыстальніцы TikTok, якія таксама прайшлі праз падобны досвед і захацелі ім падзяліцца.

– Я выйшла на працу праз 4,5 гады пасля родаў. Першыя тыдні памірала. Я нават дыялог весці толкам не магла, словы ўсе забылася, – напісала жыхарка Гародні Яраслава.

— А мне цяжка хаця б знайсці гэтую працу. Кажуць: «Прыходзьце, калі дзіцяці будзе пяць». Цяпер яму тры, – падзялілася болем беларуска Дзіна.

Частка жанчынаў прызналіся, што ўвогуле не сыходзілі з працы ці працавалі на паўстаўкі – верагодна, таму што якраз баяліся рэзкіх пераменаў пасля дэкрэту. Аднак аўтарка роліка адзначыла, што «і так працавала, і вяла блог» – гэта не дапамагло.

Самае нестандартнае меркаванне было ў карыстальніцы Алены. Яна напісала ў каментарах, што дэградуе якраз на працы – «ад манатоннай маркотнай працы», а дэкрэт – «найлепшы час яе жыцця».