Лукашэнка шукае падставу для нападу на Украіну?

• 29.06.2024, 12:45

Намеснік камандзіра ССА заявіў пра «праходы для ДРГ» на ўкраінска-беларускай мяжы.

У ССА УС Беларусі заяўляюць пра «нарастанне напружанасці» на мяжы з Украінай і сцвярджаюць, што «нашу краіну хочуць ублытаць у вайну».

«У нас ёсць інфармацыя, што Украіна збірае да нашых межаў войскі, узбраенне, ваенную тэхніку. Так, у Жытомірскай вобласці размешчаныя амерыканскія баявыя машыны пяхоты, рэактыўныя сістэмы залпавага агню, цяжкая дальнабойная артылерыя і іншая тэхніка», – сцвярджае намеснік камандзіра сілаў спецыяльных аперацый у ідэалагічнай працы Вадзім Лукашэвіч.

Паводле ягоных словаў, Украіна збірае да беларускай мяжы «вялікую колькасць асабовага складу». Ён заяўляе, што «ў шэрагу мінна-выбухных загародаў ёсць праходы», якія, на ягоную думку, прызначаны для ДРГ.

«Яны іх абсталявалі. З якой мэтай, дзеля чаго яны гэта зрабілі? Напэўна, каб надалей праз гэтыя праходы была магчымасць пракрасціся на нашу тэрыторыю дыверсійна-выведным групам ворага, рэйдавым атрадам, каб на нашай беларускай зямлі правесці дыверсіі, тэрарыстычныя акты. Акрамя таго, мы ведаем, што УСУ разгарнулі сістэмы назірання радыёэлектроннай выведкі паблізу нашых межаў, шырока выкарыстоўваюць беспілотныя лётныя апараты. Перыядычна яны, парушаючы мяжу, залятаюць на нашу тэрыторыю», – заявіў ідэолаг.

Ён запэўніў, што «падраздзяленні сілаў спецыяльных аперацый зробяць усё магчымае і нават немагчымае, каб абараніць Рэспубліку Беларусь».

Нагадаем, напярэдадні ў Дзяржаўным памежным камітэце заяўлялі пра знаходжанне ў паласе адказнасці Жытомірскага памежнага атрада «Расейскага добраахвотніцкага корпуса», выведныя палёты ўкраінскіх беспілотнікаў уздоўж мяжы з Беларуссю і знойдзены на гэтым жа кірунку тайнік «з кампанентамі для вырабу самаробных выбуховых прыладаў».