Рассельгасбанк закрыў прадстаўніцтва ў Беларусі

• 29.06.2024, 18:57

Кліенты з нашай краіны яму нецікавыя.

Рассельгасбанк, які выступае ў Расеі апорным банкам для аграпрамысловага сектара, закрыў прадстаўніцтва ў Беларусі. Аб гэтым піша «КоммерсантЪ».

Са звестак выдання, змены «звязаны з цэнтралізацыяй функцыі ўзаемадзеяння з краінамі ЕАЭС на базе галаўнога офісу».

У самім банку гэты крок тлумачаць таксама зменай фармату супрацоўніцтва з краінамі СНД. Прытрымліваючыся новага фармату вядзення бізнэсу, Рассельгасбанк з пачатку года закрыў чатыры замежныя прадстаўніцтвы, у тым ліку ў Арменіі і Казахстане.

Адмаўляючыся ад прадстаўнічых офісаў, Рассельгасбанк мае намер больш актыўна ствараць філіялы ў межах СНД і даччыныя кампаніі ў далёкім замежжы.

Кіроўны дырэктар рэйтынгавага агенцтва «Эксперт РА» Юрый Белікаў уважае, што сёння расейскія банкі не зацікаўлены ў тым, каб «прыцягваць мноства новых рынкавых кліентаў з краін СНД, так як кошт такога прыцягнення даволі высокі».

Актуальная тэндэнцыя – адкрыццё прадстаўніцтваў у Кітаі, які стаў галоўным месцам прыцягнення расейскіх банкаў.