У Санкт-Пецярбургу адбылася страляніна з удзелам 12 чалавек

• 14.07.2024, 11:48

Перастрэлку ўчынілі мясцовыя таксісты, якія не падзялілі кліентаў.

У расейскім Санкт-Пецярбургу адбыліся разборкі са стральбой, удзел у якіх узялі 12 чалавек. Былі затрыманыя трое мігрантаў, якія падазраюцца ў датычнасці да перастрэлкі.

Гэта мужчыны 1990, 1995 і 2000 гадоў нараджэння, іх даставілі ў пастарунак.

Папярэдне страляніну ўчынілі таксісты, якія нібыта не падзялілі кліентаў, паведамляюць СМІ.

«Па вуліцы разгульвалі мужчыны са зброяй і стралялі ў сваіх апанентаў, хаваючыся за прыпаркаванымі аўтамабілямі. У двух з іх былі прадметы, падобныя на аўтаматы, і ў аднаго - пісталет. У гэты момант няма дакладнай інфармацыі, была зброя баявой, халастой ці траўматычнай», – пішуць СМІ.

Паведамляецца, што падазраваныя ўцяклі з месца стральбы на дзвюх легкавушках: белы Volkswagen Polo - супрацоўнікі МУС ужо затрымалі яго кіроўцу і двух пасажыраў, і чорны Hyundai - ён з'ехаў з месца стральбы на вялікай хуткасці.

Паведамленняў аб пацярпелых з лякарняў не паступала, астатніх стралкоў пакуль яшчэ шукаюць.

Пасля стала вядома, што была распачатая крымінальная справа паводле артыкула «хуліганства з ужываннем зброі». Усе ўдзельнікі стральбы ўстанаўліваюцца.