Гарадзенец за сем гадзін змог даехаць з Варшавы ў Гародню
- 18.07.2024, 12:16
І расказаў, як яму гэта ўдалося.
Ва ўмовах новаўвядзенняў на мяжы, падарожнікам можа быць карысны досвед чытача autogrodno.by Сяргея, які нядаўна праехаў з Гародні ў Варшаву за 9 гадзін, а назад - за 7. Ён кажа, што такое задавальненне могуць дазволіць сабе матацыклісты.
- Мэта маёй паездкі - наведванне канцэрта Metallica, які адбыўся ў Варшаве 7 ліпеня. Мая паездка адбылася за некалькі дзён да ўсіх гэтых калатнечаў, якія адбыліся на мяжы. Але, думаю, мой досвед можа быць карысны іншым і цяпер. Увогуле, у мяне тады стала пытанне - як дабірацца, каб не моцна стаміцца ад дарогі. Паміж уласным аўтамабілем, аўтобусам і матацыклам абраў трэці варыянт і не пралічыўся, - кажа Сяргей.
Канцэрт пачынаўся блізу 9-й вечара ў нядзелю і Сяргей выехаў з Гародні ў суботу а 10 раніцы, мужчына паехаў праз Берасце і да шасці вечара ўжо быў у Варшаве.
- Заехаў у «Зону чакання» ля ПП у Берасці, у мяне матацыкл, то агульную чаргу стаяць не трэба. Гэта значыць, я падышоў па талончык, паказаў свой тэхпашпарт і мяне адразу ж паставілі першым у чаргу на выезд з зоны. Такім чынам мне ўжо ўдалося апярэдзіць амаль 150-200 аўтамабіляў з «Зоны чакання». Затым уехаў на самую мяжу і таксама змог пад'ехаць проста да пашпартнага кантролю. Уся дарога ад Гародні да Варшавы заняла ў мяне 9 гадзін. Мог бы і яшчэ хутчэй дабрацца, але са мной быў сябар, якому трэба было зрабіць некалькі спраў па дарозе і мы крыху затрымаліся, - успамінае Сяргей.
Затое дарога назад прайшла яшчэ хутчэй.
- З Варшавы да Гародні ехаў 7 гадзін. Адваротную чаргу таксама аб'ехаў, ніякіх прэтэнзій да матацыкліста ні ў каго не было, таму таксама адразу пад'ехаў пад шлагбаўм, - кажа мужчына.
Сярэдні выдатак паліва на матацыкле BMW RT1200 склаў блізу 7 літраў на 100 кіламетраў. На польскай старане мужчына рухаўся з хуткасцю звыш 140 км/г і, кажа, зусім не стаміўся. З нюансаў, страхоўка на матацыкл выявілася даражэйшай, чым на аўтамабіль і каштавала амаль 206 злотых на месяц, затое пры перасячэнні мяжы з Беларуссю не трэба выплачваць унёсак 40 рублёў, як для легкавых аўтамабіляў.
Калі вам трэба хутка з'ездзіць у Польшчу і назад, то досвед Сяргея добры прыклад.