За год колькасць беларусаў, занятых у эканоміцы Літвы, вырасла на 4,3 тысячы

• 22.07.2024, 19:43

Паводле працоўнай дамовы ў Літве працуюць амаль 48 тысяч грамадзян нашай краіны.

У Літве беларусы дамінуюць сярод усіх замежнікаў не з ЕЗ, якія працуюць у IT і сферы транспарту, паведамляе Delfi са спасылкай на службу занятасці краіны.

Беларусы складаюць большасць сярод замежнікаў, занятых у інфармацыйна-камунікацыйным і транспартным сектарах Літвы. У літоўскім IT нашы суайчыннікі занялі асноўную долю работнікаў з краін, якія не ўваходзяць у ЕЗ, - 63,9%, у транспартнай галіне - 47,2%.

Ва ўсіх астатніх галінах большасць удзельнікаў літоўскага рынку працы з ліку замежнікаў - гэта ўкраінцы.

Паводле інфармацыі службы занятасці, усяго за год колькасць працоўных імігрантаў у Літве павялічылася на 23,3 тысячы чалавек. На літоўскі рынак працы прыбылі 138,3 тысячы грамадзян трэціх краін са 132 краін свету.

Найменшы рост прыезджых сёлета фіксаваўся сярод расейцаў - у Літве працаўладкаваліся ўсяго 26 чалавек. Нязначна змянілася і колькасць працуючых украінцаў - яна вырасла на 1,7 тысячы. А вось колькасць беларусаў на рынку працы вырасла на дзясятую частку - на 4,3 тысячы. Таксама стала больш працоўных імігрантаў з краін Азіі і Афрыкі.

Нагадаем, паводле звестак на пачатак года, дазвол на жыхарства ў Літве маюць 62,5 тысячы грамадзян Беларусі. Большая частка беларусаў, якія аселі ў суседняй краіне, працаўладкаваная, а непаўналетніх і паджылых людзей, старэйшых за 65 гадоў, з Беларусі агулам не больш за пяць тысяч. Паводле працоўнай дамовы ў Літве працуюць 47 726 грамадзян нашай краіны.