Кулеба правёў перамовы з кіраўніком МЗС Кітая

• 24.07.2024, 11:18

Стала вядома, пра што ўдалося дамовіцца.

Міністр замежных спраў Кітая Ван І сустрэўся з міністрам замежных спраў Украіны Дзмітрыем Кулебам у Гуанчжоу.

Пра гэта паведамляе прэс-служба МЗС Кітая.

Ван І падкрэсліў сяброўства і супрацоўніцтва паміж Кітаем і Украінай, адзначыўшы, што абедзве краіны з'яўляюцца стратэгічнымі партнёрамі ўжо больш за дзесяць гадоў. Ён таксама адзначыў, што Кітай працягне падтрымліваць сувязь з Украінай, умацоўваць узаемны давер і развіваць супрацоўніцтва.

Кітай паабяцаў працягваць імпарт прадуктаў харчавання з Украіны і падтрымліваць лагістычныя калідоры. Ван І выказаў падзяку Украіне за дапамогу ў эвакуацыі кітайскіх грамадзян у пачатку поўнамаштабнага ўварвання РФ і спадзяецца на далейшую бяспеку кітайскага персаналу ва Украіне.

Ван І таксама абмеркаваў вайну ва Украіне, адзначыўшы прыхільнасць Кітая да палітычнага развязання канфлікту і падтрымку мірных перамоў.

Кулеба адзначыў стратэгічнае партнёрства паміж Украінай і Кітаем, выказаў падтрымку прынцыпу "аднаго Кітая".

У той жа час Кулеба заявіў, што Украіна высока ацэньвае канструктыўную ролю Кітая ва ўмацаванні міру і міжнароднага парадку.

“Уважліва вывучыўшы шасціпунктны кансэнсус Кітая і Бразіліі, Украіна выказала гатоўнасць да разумных і канструктыўных перамоў з Расеяй для дасягнення справядлівага і трывалага міру”, - гаворыцца ў паведамленні.

Стораны таксама абмеркавалі міжнародныя і рэгіянальныя пытанні, якія маюць узаемную цікавасць.