У Менску на чыгуначных шляхах адбылася выцечка небяспечнага рэчыва

• 10.08.2024, 12:45

У МНС расказалі падрабязнасці.

У Менску на чыгуначных шляхах каля вуліцы Казінца 9 жніўня адбылася цеча раствору бензілхларыду. Як расказалі ў МНС, ён пацёк з кантэйнера пры фармаванні саставу цягніка.

Інцыдэнт адбыўся ў 14:30, у 15:50 супрацоўнікі «Беларускай чыгункі» перавезлі вагон на станцыю «Мінск-сартавальны», каб ліквідаваць цечу, расказалі ў МНС.

Бензілхларыд – гэта бясколерная вадкасць з вельмі рэзкім пахам. Яе ўжываюць як прамежкавае хімічнае злучэнне пры вытворчасці пэўных фарбавальнікаў і фармацэўтычных прадуктаў, а таксама ў якасці праяўляльніку фатаграфій.

Пры ўдыханні бензілхларыду чалавекам можа адбыцца моцнае раздражненне верхніх дыхальных шляхоў, скуры, вачэй, слізістых абалонак, ацёк лёгкіх.

Як расказалі ў МНС, супрацоўнікі ўстановы забяспечылі бесперабойную падачу вады для ахаладжэння кантэйнера са 100°C да 23°C і асаджэння пароў рэчыва. Потым кантэйнер выявілі і пачалі даставаць рэчыва.

Паводле інфармацыі МНС, ніхто не пацярпеў, людзей не эвакуявалі. «Пагрозы жыццю і здароўю насельніцтва няма», – праінфармавалі ва ўстанове.

Прычына здарэння пакуль невядомая, але ў спецыялістаў ёсць версія: пры транспартаванні кантэйнера з бензілхларыдам парушылася цэласнасць ёмістасці.