Спартоўцаў з Беларусі дапусцілі да ўдзелу ў цырымоніі закрыцця Алімпіяды ў Парыжы

• 11.08.2024, 15:23

Яна пройдзе сёння ўвечары.

Спартоўцаў з Беларусі і Расеі, якія выступаюць на Алімпіядзе ў Парыжы ў індывідуальным нейтральным статусе, дапусцяць да ўдзелу ў цырымоніі закрыцця Алімпійскіх гульняў. Аб гэтым паведамляе Reuters са спасылкай на заяву Міжнароднага алімпійскага камітэта.

Міжнародны алімпійскі камітэт паведаміў, што расейскія і беларускія спартоўцы, якія выступаюць на Алімпіядзе ў Парыжы як нейтральныя індывідуальныя ўдзельнікі без сцяга і нацыянальных сімвалаў, змогуць узяць удзел у цырымоніі закрыцця Алімпіяды. Яна пройдзе ўвечары 11 жніўня.

У цырымоніі адкрыцця 26 ліпеня, калі каманды праходзілі па рацэ Сена на лодках, беларускія спартоўцы не ўдзельнічалі, бо наша краіна на Гульнях прадстаўленая ў нейтральным статусе.

«Выканаўчы камітэт МАК пастанавіў, што нейтральныя індывідуальныя спартоўцы змогуць узяць удзел у цырымоніі закрыцця Алімпійскіх гульняў у Парыжы 2024 года», - гаворыцца ў заяве камітэта.