Штучны інтэлект навучылі выяўляць хваробы людзей па фота языка

• 13.08.2024, 19:38

Сістэма правільна вызначыла дыягназ у 98% выпадкаў.

Даследнікі з Ірака і Аўстраліі распрацавалі сістэму, якая можа выявіць розныя захворванні, проста аналізуючы выяву языка чалавека. Пра гэта паведамляе NewAtlas.

Выкарыстоўваючы машыннае навучанне, яны дабіліся амаль ідэальнай дакладнасці ў дыягностыцы. Аналіз языка як спосаб дыягностыкі вядомы ўжо тысячы гадоў, асабліва ў традыцыйнай кітайскай медыцыне. Улічваючы каштоўнасць гэтага метаду, навукоўцы з Middle Technical University і Універсітэта Паўднёвай Аўстраліі наважылі мадэрнізаваць яго з дапамогай сучасных тэхналогій.

Яны навучылі штучны інтэлект на аснове 5260 выяў языкоў, зробленых пры розных умовах асвятлення. Таксама былі выкарыстаныя выявы пацыентаў з вядомымі хваробамі, такімі як астма, дыябет і анемія.

Пры тэставанні сістэма правільна вызначыла дыягназ у 98% выпадкаў, аналізуючы языкі пацыента з дапамогай камеры, размешчанай на адлегласці 20 см. Сістэма рабіла гэта ў рэальным часе.

Са слоў прафесара Алі Аль-Наджы, колер, форма і таўшчыня языка могуць паказваць на розныя захворванні. Напрыклад, жоўты язык часта сустракаецца ў людзей з дыябетам, пурпурны з тоўстым налётам можа сведчыць аб раку, а белы язык - аб анеміі.

Цікава, што тэхналогію можна лёгка ўбудаваць у смартфоны, што дазволіць людзям самастойна правяраць сваё здароўе. Такі тэст таксама можа дапамагчы ў выяўленні выпадкаў COVID-19, бо даследаванне ва Украіне паказала, што ў 99% пацыентаў з цяжкай формай віруса язык быў цёмна-чырвонага колеру.

Такім чынам, неўзабаве для праверкі свайго здароўя дастаткова будзе проста паказаць язык камеры смартфона.