«Мама, мы ў шоку»: расейскія прызыўнікі ў Курскай вобласці раптоўна апынуліся на перадавой

• 16.08.2024, 10:17

Іх размясцілі без зброі ў вёсцы за 500 метраў ад мяжы.

Прэзідэнт Расеі Уладзімір Пуцін абяцаў, што дрэнна навучаных прызыўнікоў не будуць адпраўляць на вайну ва Украіне. Аднак зараз лінія фронту перайшла на тэрыторыю РФ, і сем'і прызыўнікоў, дыслакаваных у Курскай вобласці, б'юць трывогу наконт сваіх блізкіх. У розных сацыяльных сетках распаўсюджваюцца дзясяткі паведамленняў ад людзей, якія сцвярджаюць, што яны з'яўляюцца сямейнікамі расейскіх прызыўнікоў, якія зніклі без вестак у Курскай вобласці.

Як піша CNN, паведамленні ў расейскіх Telegram-каналах за апошнія некалькі дзён паказалі, наколькі РФ была не гатовая да такога нападу.

«Калі а трэцяй гадзіне ночы мяжу атакавалі танкі, там былі толькі прызыўнікі, якія баранілі сябе. Яны не бачылі ніводнага жаўнера, ніводнага кантрактніка - яны наогул нікога не бачылі. Мой сын патэлефанаваў пазней і сказаў: «Мама, мы ў шоку», - напісала маці вайскоўца-тэрміновіка з Курскай вобласці.

Акрамя таго, расейскае выданне навін «Вёрстка» апублікавала інтэрв'ю з Наталляй Апель, бабуляй аднаго з расейскіх прызыўнікоў, які служыў у Курску і зараз уважаюцца за зніклых без вестак.

Яна расказала, што яе ўнук Уладзіслаў быў раскватараваны - без зброі - у вёсцы за 500 метраў ад мяжы. «Што маглі зрабіць хлапчукі? Ісці супраць украінскіх жаўнераў з рыдлёўкай?», - сказала яна.

Як адзначае CNN, той факт, што Расея спадзявалася на прызыўнікоў пры абароне мяжы, магчыма, тлумачыць, чаму ўкраінскім войскам удалося прасунуцца на расейскую тэрыторыю з такой відавочнай лёгкасцю.

У адрозненне ад прафесійных жаўнераў, прызыўнікі праходзяць толькі абмежаваную падрыхтоўку перад адпраўкай на службу, бо закон забараняе ім адпраўляцца за мяжу, і яны не прызначаныя для ўдзелу ў баявых дзеяннях.

Замест гэтага Расея часта размяшчае іх на межах. Але калі Украіна пачала сваё нядаўняе нечаканае ўварванне, гэтыя прызыўнікі раптоўна апынуліся на перадавой, зусім не гатовыя да самаабароны.