Знішчаны Су-34, яшчэ два пашкоджаныя: ГУВ раскрыла страты расейцаў пасля ўдару па аэрадроме «Марозаўск»

• 5.08.2024, 11:16

Побач з бартамі зафіксаваны варонкі ад выбухаў.

Звесткі касмічнай выведкі сведчаць, што ў выніку агнявой паразы вайсковага аэрадрома дзяржавы-агрэсаркі Расеі "Марозаўск" у Растоўскай вобласці 3 жніўня 2024 года знішчаны бамбавік Су-34. Пра гэта паведаміла Галоўная ўправа Міністэрства абароны Украіны.

Адзначаецца, што яшчэ два расейскія самалёты такога ж тыпу магчыма пашкоджаныя абломкамі - побач з бартамі зафіксаваны варонкі ад выбухаў.

Таксама ў ГУВ праінфармавалі, што быў поўнасцю знішчаны варожы склад авіяцыйнага ўзбраення - ад другаснай дэтанацыі расейскіх боепрыпасаў на тэрыторыі аэрадрома і вакол яго бачныя вялікія плошчы выпаленай зямлі.

«Чатыры тэхнічныя будынкі і два ангары на авіябазе «Марозаўск», размешчанай за 265 кіламетрах ад лініі фронту, таксама атрымалі выразна прыкметныя з космасу пашкоджанні», - заявілі ва ўкраінскай выведцы.