Камала Гарыс афіцыйна абвясціла кандыдата ў віцэ-прэзідэнты ЗША

• 6.08.2024, 18:08

Гэта губернатар Мінесоты Цім Уолц.

Камала Гарыс, якая балатуецца на пасаду прэзідэнта ЗША ад Дэмакратычнай партыі, пастанавіла абраць кандыдатам у віцэ-прэзідэнты губернатара Мінесоты Ціма Уолца.

Кандыдат Гарыс далучыцца да яе на буйным мітынгу ў Філадэльфіі 6 жніўня, пасля чаго адправіцца ў турнэ па асноўных штатах, паведамляе The New York Times.

60-гадовы Цім Уолц - былы вайсковец Нацыянальнай гвардыі ЗША і былы настаўнік. Займае пасаду губернатара штата Мінесота са студзеня 2019 года.

Каманда Камалы Гарыс пачала шукаць кандыдата на пасаду віцэ-прэзідэнта два тыдні таму, неўзабаве пасля таго, як дзейны прэзідэнт ЗША Джо Байдэн абвясціў 21 ліпеня, што не будзе балатавацца на новы тэрмін, і падтрымаў Камалу Гарыс як кандыдата ў прэзідэнты ад Дэмакратычнай партыі.