«Асяроддзе Лукашэнкі разумее, што ён - лузер»

• 9.08.2024, 15:07

Калі сілавікі паўстануць супраць дыктатара?

Галоўная рэдактарка сайта Charter97.org Наталля Радзіна мяркуе, што ў пэўны момант сілавікі могуць перайсці на бок беларускага народа. Пра гэта яна расказала ў інтэрв'ю вядомаму расейскаму журналісту Яўгену Кісялёву:

- У 2020 годзе, на жаль, яны гэтага не зрабілі, бо бачылі, што Масква падтрымлівала Лукашэнку. Але калі не будзе падтрымкі Расеі, у ёй самой пачнуцца праблемы (а ў выніку вайны гэта непазбежна), то я перакананая, што войска і частка беларускіх сілавікоў пяройдуць на бок народа.

Думаю, што за гэтыя чатыры гады ў іх галовах таксама адбыліся змены. Не думаю, што ім усім падабаецца ўдзельнічаць у рэпрэсіях. Так, ёсць частка (упэўнена, што яна невялікая), якая за грошы, за рангі, дзеля садысцкага задавальнення арыштоўвае апазіцыянераў, вышуквае іх паўсюль, збівае і катуе. Такіх людзей не можа быць большасць.

Большасць, на жаль, пакуль не ведае, што рабіць з Лукашэнкам. Аднак тое, што незадаволенасць ёсць і сярод сілавікоў, я ўпэўнена. У пэўны момант, калі яны зразумеюць, што рэжым аслабеў, што Расея не абароніць злачынцаў, якія знаходзяцца ва ўладзе, думаю, яны стануць на бок народа.

Наталля Радзіна мяркуе, што наменклатура бачыць няздольнасць Лукашэнкі кіраваць краінай:

- Не толькі мы з вамі разумеем, што Лукашэнка лузер. Больш за тое, ён не ў стане сёння кіраваць краінай, ён здаў яе Расе. І гэта разумеюць беларускія чыноўнікі. Яны ведаюць, што тая вайна, якую Пуцін развязаў не толькі супраць Украіны, але і ўсяго Захаду, у якую ўцягнулі Беларусь, нічым добрым не скончыцца.

Таму я спадзяюся на разважлівасць некаторых прадстаўнікоў беларускай наменклатуры, што яны змогуць праводзіць нейкую сваю гульню. Мне складана сказаць, як гэта магчыма ў цяперашняй сітуацыі, але, мне здаецца, у Беларусі прыадчыняецца акно магчымасцей.