ISW: У Крамлі спрабуюць знайсці пасрэднікаў для перамоў з Украінай
- 10.09.2024, 9:31
Місію ўсклалі на Лаўрова.
Расейскія чыноўнікі спрабуюць сфармаваць міжнародныя мірныя пасрэдніцкія намаганні ў вайне ва Украіне. Пры гэтым у Крамлі дэманструюць нежаданне Расеі ўдзельнічаць у добрасумленных перамовах з Украінай, крытыкуючы мірную формулу прэзідэнта Уладзіміра Зяленскага.
Як гаворыцца ў справаздачы Інстытута вывучэння вайны (ISW), 9 верасня міністр замежных спраў Расеі Сяргей Лаўроў сустрэўся з міністрам замежных спраў Бразіліі Маўра Віейрай і міністрам замежных спраў Індыі Субрахманьямам Джайшанкарам на палях пасяджэння Савета супрацоўніцтва Расеі і краін Персідскай затокі ў Савудаўскай Арабіі.
У МЗС Расеі заявіла, што Лаўроў абмеркаваў вайну ва Украіне з Віейрай і Джайшанкарам. Іншыя падрабязнасці не паведамляліся.
Бразілія і Кітайская Народная Рэспубліка з траўня прасоўваюць свой мірны план «Палітычнае ўрэгуляванне ўкраінскага крызісу» з шасці пунктаў, ключавыя прынцыпы якога спрыяльныя для Расеі.
Прэм'ер-міністр Індыі Нарэндра Модзі нядаўна пацвердзіў падтрымку Індыяй міру ва Украіне на аснове прынцыпаў міжнароднага права, такіх, як павага тэрытарыяльнай цэласнасці і суверэнітэту дзяржаў.
Аднак Лаўроў паўтарыў шаблонныя крамлёўскія наратывы, якія дэманструюць нежаданне Расеі весці добрасумленныя перамовы з Украінай, сцвярджаючы, што мірная формула прэзідэнта Украіны Уладзіміра Зяленскага з'яўляецца «ультыматумам» і што Расея ніколі сур'ёзна не разглядала гэты план.