Самая доўгая рака Польшчы крытычна змялела

• 10.09.2024, 10:51

У Варшаве ўзровень вады ў Вісле склаў усяго 22 сантыметры.

Узровень самай доўгай ракі Польшчы, Віслы, упаў да рэкордна нізкага ўзроўню. У выніку гэтага ў Варшаве агаліліся пясчаныя водмелі, а рака стала настолькі плыткай, што на адным з адцінкаў яе зараз могуць уброд перасякаць жывёлы. Пра гэта паведамляе Reuters.

Са звестак службы маніторынгу змены клімату Еўрапейскага звязу, у паўночнай кулі было самае спякотнае лета з моманту пачатку вядзення ўліку. Гэта прывяло да засух у многіх раёнах.

Як паведамляецца, у Варшаве ўзровень вады ў рацэ склаў усяго 22 см. Папярэдні рэкордна нізкі ўзровень складаў 26 см у 2015 годзе. Глыбіня ракі ў Варшаве звычайна дасягае 105-250 см.

«Не было ападкаў, былі высокія тэмпературы, што азначае высокае выпарэнне, але ў той жа час цёплыя зімы. Гэта азначала адсутнасць адлігі, таму не было аднаўлення рэсурсаў, паверхневых і грунтавых вод», - растлумачылі ў Польскім інстытуце метэаралогіі і воднай гаспадаркі.