У Польшчы асуджаная беларуска, якая шпіёніла для КДБ

• 10.09.2024, 15:11

Дзяўчына пайшла на супрацоўніцтва з польскімі спецслужбамі.

У Польшчы асуджаная грамадзянка Беларусі, якая шпіёніла за эмігранцкай супольнасцю ў інтарэсах КДБ. Яе прысудзілі да 2 гадоў і 8 месяцаў пазбаўлення волі. Паведамляецца, што жанчына пайшла на супрацоўніцтва з польскімі спецслужбамі, разлічваючы на змякчэнне пакарання.

Акруговы суд Варшавы разгледзеў справу Дар'і А., якая абвінавачваецца ў перадачы інфармацыі аб дзейнасці і фінансаванні беларускіх апазіцыйных арганізацый. Гэтыя звесткі, як сцвярджаецца, выкарыстоўваліся прапагандай рэжыму Лукашэнкі.

Раней СМІ паведамлялі, што затрыманая — былая актывістка "Гавары праўду" Дар'я Астапенка з Баранавічаў. З чутак, яна працавала порнаакторкай і прапаноўвала эскорт-паслугі, што магло быць выкарыстана для яе вярбоўкі беларускімі спецслужбамі.