У Менску закрываюцца крамы папулярнага польскага абутку

• 13.09.2024, 17:03

Праз санкцыі.

У Менску з 29 верасня канчаткова закрываюцца крамы польскага абутку Wojas, піша «Смартпресс» са спасылкай на прадстаўнікоў рытэйлера.

«Заснавальнік, польскі бок, прыняў пастанову. 29 верасня - апошні працоўны дзень дзвюх крам: у ГЦ Expobel і ў GreenCity. У ГЦ «Замак» крама ўжо закрытая», - паведамілі парталу ў кампаніі «Ваяс Бел».

Там расказалі, што спрабавалі атрымаць квоты ад Беллегпрама, але рэгулятар квоты летам не выдаў.

«Няма тавару, і няма магчымасці завезці тавар. Мы спрабавалі, і заснавальнікі спрабавалі. Але, на жаль, у сувязі з санкцыямі няма магчымасці працягваць працу», - растлумачылі прадстаўнікі рытэйлера.

Нераспрададзеныя да 29 верасня рэшткі абутку і галантарэі будуць вернутыя назад у Польшчу. Гэта стандартная працэдура напрыканцы кожнага сезона.

У кампаніі таксама адзначылі, што аналагічная сітуацыя ва ўсіх прадаўцоў польскага абутку: «Ніхто не змог завезці тавар».