Кіпр пазбавіў грамадзянства ўкраінскага алігарха Каламойскага
- 15.09.2024, 12:56
Названая прычына.
Кіпр пазбавіў свайго грамадзянства восем чалавек. Сярод іх - і ўжо былы ўладальнік «залатога пашпарта» ўкраінскі алігарх Ігар Каламойскі.
Кіпрскае грамадзянства алігарха ўлады Кіпра вызначылі як пагрозу рэпутацыі дзяржавы. Падрабязнасці паведаміла кіпрскае выданне Philenews.
Паводле інфармацыі выдання, пастанова аб пазбаўленні кіпрскага грамадзянства ўкраінскага алігарха Ігара Каламойскага была прынятая яшчэ 9 красавіка 2024 года. Падставай для гэтага стала заява ўладаў Кіпра аб тым, што гэтае грамадзянства Каламойскі атрымаў «шляхам махлярства, ілжывых заяў і ўтойвання істотных фактаў».
«У пастанове ад 2024.04.09 паказана, што як да, так і пасля натуралізацыі ён быў і з'яўляецца асобай з сумнеўнай рэпутацыяй, таму яго натуралізацыя і прысутнасць на востраве стварала і стварае велізарныя пагрозы для рэпутацыі Кіпра», – адзначае Philenews.
Цікава, што як ключавы пры прыняцці астановы выданне называе той факт, што Каламойскі ў сваёй заяве на атрыманне грамадзянства ў 2010 годзе праз інвестыцыйную праграму не згадаў, што фігуруе ў справе аб ухіленні ад выплаты падаткаў у РФ ад 2008 года.
Таксама Philenews нагадала аб тым, у чым абвінавачваюць Каламойскага ва Украіне.
«Ва Украіне алігарха абвінавачваюць ва ўхіленні ад выплаты падаткаў і крадзяжы ва ўкраінскай нафтаздабыўной кампаніі «Укрнафта» і НПЗ «Укртатнафта». Акрамя таго, Каламойскаму выстаўленыя шматлікія абвінавачанні, у тым ліку растрата амаль 145 мільёнаў даляраў ЗША з найбуйнейшага прыватнага банка Украіны і ўдзел у схеме заказнога забойства. Паводле звестак следства, Каламойскі нібыта аддаў загад аб забойстве кіраўніка «адной з законных кампаній», які ў 2003 годзе адмовіўся прыняць пастанову, што адпавядала яго ўласным інтарэсам. Цяпер ён знаходзіцца пад вартай паводле гэтай справы», - піша выданне.
Кіпрскія журналісты згадалі таксама аб «адмыванні больш чым 36 млн даляраў шляхам пераводу сродкаў за мяжу з выкарыстаннем інфраструктуры падкантрольных банкаў у перыяд з 2013 да 2020 года».
«Пасля расследавання, праведзенага незалежнай камісіяй, было ўстаноўлена, што Каламойскі датычны да сур'ёзных злачынстваў, якія прыцягнулі шырокую міжнародную ўвагу з боку дзяржаўных і прыватных арганізацый значнымі негатыўнымі каментарамі і абвінавачваннямі ў махлярстве на вялізныя сумы. Сярод іншага зафіксаванае затрыманне СБУ 09.02.2023 падазраваных у адмыванні грошай і махлярстве на суму 130,5 млн даляраў у перыяд 2013-2020 гадоў; новыя абвінавачванні, гэтым разам у растраце сумы 250 мільёнаў даляраў у ПрыватБанку, філіял якога таксама дзейнічаў на Кіпры», - піша выданне.
Таксама Philenews згадала, што ў жніўні 2020 года Міністэрства юстыцыі ЗША пачало справу па арышце маёмасці, набытай кіпрскім аддзяленнем ПрыватБанка, у розных штатах, а 5 сакавіка 2021 года Дзярждэп забараніў Каламойскаму ўезд у ЗША праз датычнасць да карупцыйных спраў.
А ў верасні 2019 года, паводле звестак выдання, МЗС Кіпра атрымала інфармацыю аб выкарыстанні кіпрскага аддзялення ПрыватБанка «для адмывання незаконных грошай і іншых супрацьпраўных дзеянняў».
Акрамя Каламойскага, у той жа дзень Кіпр пазбавіў грамадзянства сям'ю егіпецкага інвестара Махамеда Абдэльрахмана Махамеда Салема і сям'ю расейца Максіма Захарчанкі.
Нагадаем, вядома, што ў Каламойскага было сама меней тры грамадзянствы: Украіна, Кіпр і Ізраіль. Увесну 2023 года, ужо знаходзячыся пад вартай, Каламойскі заявіў журналістам, што яго пазбавілі грамадзянства Украіны. Ускосна гэта пацвярджалася тэкстам падазрэння: там адзначана, што ў Каламойскага два грамадзянствы, але не Украіны.
Каламойскі спрабаваў аспрэчыць у судзе ўказ Зяленскага аб грамадзянстве. Аднак зрабіў ён гэта толькі ў канцы лістапада 2023 года, выйшаўшы за межы ўстаноўленага заканадаўствам шасцімесячнага тэрміна. Ён патлумачыў, што нібыта не ведаў, што яго пазбавілі грамадзянства, але Вярхоўны Суд гэта не пераканаў.