Нямеччына змяніла правілы падачы дакументаў на шэнгенскія візы

• 16.09.2024, 12:37

Беларусам на вока.

Пасольства Нямеччыны больш не будзе прымаць выпіскі з рахункаў, калі яны былі адкрытыя на працягу 6 месяцаў да падачы дакументаў і з іх не ажыццяўляліся транзакцыі.

"Гэта тычыцца як дэпазітных рахункаў, так і ўсіх астатніх тыпаў банкаўскіх рахункаў", - паведамілі ў нямецкім дыппрадстаўніцтве.

Чалавеку, які захоўвае грошы дома і спецыяльна пад паездку адкрывае рахунак, экспэрты раяць прынесці ў пасольства дзве выпіскі. Адну - з асноўнай карткі, з якой ідзе аплата "штодзённых" плацяжоў у беларускіх рублях. На гэтым рахунку можа быць недастатковая сума для паездкі. А таксама ўзяць з сабой другую выпіску - з валютнага рахунку, створанага нядаўна, але на якім ёсць неабходная сума для паездкі.

У тых, хто толькі плануе запісацца для падачы дакументаў на візу ў пасольства Нямеччыны, ёсць час выканаць усе ўмовы. Чакаць чаргі для падачы дакументаў беларусам часам даводзіцца да года.