Рассельгаснагляд узяў пад узмоцнены кантроль прадукцыю пяці беларускіх прадпрыемстваў

• 16.09.2024, 15:48

Больш за ўсё прэтэнзій да ялавічыны.

Рассельгаснагляд узмацніў кантроль над прадукцыяй пяці беларускіх прадпрыемстваў. Ведамства накіравала ліст у Федэральную мытную службу, дзе ўдакладняецца, што ўзмоцнены лабараторны кантроль закране наступныя прадпрыемствы:

- "Шчучынскі філіял Гарадзенскага абласнога спажывецкага таварыства цэх мясных паўфабрыкатаў" (у ялавічыне выяўлены хіналоны - антыбактэрыйныя прэпараты);

- філіял Барысаўскага мясакамбіната і каўбасны цэх ААТ «Александрыйскае» (у ялавічыне знойдзены бактэрыі групы кішачнай палачкі);

- Жабінкаўскі камбікормавы завод (незарэгістраваныя ГМА-кампаненты або перавышэнне дапушчальных узроўняў у карме для котак);

- філіял "Юніміт" кампаніі "Смалявічы Бройлер" (у паўфабрыкатах з птушкі выяўлены парушэнні мікробнай бяспекі).

Акрамя таго, часова прыпынены пастаўкі прадукцыі "Белфуд Прадакшн" з-за паўторнага выяўлення энрафлаксацыну ў дзіцячых мясных кансервах.