У Гарадзенскай вобласці прадаюць базу адпачынку

• 17.09.2024, 11:25

Аб'ект размешчаны ў маляўнічым месцы на беразе Зэльвенскага вадасховішча.

На аўкцыён выставілі базу адпачынку "Беражкі", якая знаходзіцца ў Зэльвенскім раёне Гарадзенскай вобласці, паведамілі на пляцоўцы "БУТБ-Маёмасць".

Пачатковы кошт аб'екта - блізу Br251,2 тыс. ($78,9 тысяч). Памер задатку - Br25,2 тыс. ($7,9 тыс.). Першы крок таргоў - 5%.

У інфармацыі аб лоце пазначана, што агульны пляц аб'екта складае 992,5 м2. У яго ўваходзяць 25 дамкоў для адпачынку, прыбіральні, вартоўня, вагон-душавая, вагон-сталовая і іншыя збудаванні.

Размешчаная база адпачынку на беразе Зэльвенскага вадасховішча. Таму аб'ект прыдатны ў якасці месца для адпачынку і аздараўлення.

Прадае "Беражкі" Зэльвенскае раённае ўнітарнае прадпрыемства жыллёва-камунальнай гаспадаркі.

Аўкцыён запланаваны на 16 кастрычніка. Прыём заявак - да 11 кастрычніка.