Уначы ў Беларусь прывезлі новую партыю ядзернага паліва

• 17.09.2024, 20:40

Цягнік з РФ суправаджаўся беспілотнікамі.

«Супольнасць чыгуначнікаў Беларусі» высветліла, што мінулай ноччу ў Беларусь даставілі ўранавыя цеплавылучальныя зборкі (ЦВЗ) – ядзернае паліва для працы АЭС.

Паліва для АЭС было дастаўлена ў Астравец з Расеі па чыгунцы ў ноч з 16 на 17 верасня 2024 года. Цягнік прыбыў на станцыю Баброўнікі блізу 00:30 17 верасня. Адпраўніком грузу з'яўляецца кампанія «Расатам».

Маршрут цягніка з уранавым палівам праходзіў праз Оршу, Калодзішчы, Шабаны, Памыслішча (у аб'езд Менска), Дзегцяроўку, Крыжоўку, Маладзечна, Ашмяны і Баброўнікі.

Чыгуначнікі адзначаюць, што паліва перавозілі па чыгуначнай галіне ў аб'езд Менска, а для аховы руху цягніка задзейнічалі вайскоўцаў, супрацоўнікаў МУС і КДБ. Таксама цягнік суправаджаўся беспілотнікамі.