Клімат змяніў лясы Беларусі

• 18.09.2024, 9:40

Удар у асноўным прыпаў на паўднёвыя раёны.

У Беларусі ў параўнанні з сярэдзінай ХХ стагоддзя доля сасновых лясоў знізілася да 48%. Раней яна дасягала 58%.

Аб гэтым заявіў дырэктар Інстытута лесу Нацыянальнай акадэміі навук Аляксандр Кавалевіч.

- З 2017 года ў хваёвых лясах адзначанае зніжэнне біялагічнай устойлівасці і іх масавае ўсыханне. Пацяпленне клімату прывяло да ўзмацнення агрэсіўнасці караедаў, з'яўлення новых інвазіўных відаў шкоднікаў і хвароб.

Удар у асноўным прыпаў на паўднёвыя раёны. Толькі своечасова распрацаваны і ажыццёўлены алгарытм Інстытута лесу і Мінлясгаса дазволіў за 3 - 4 гады ліквідаваць выбліск. Але не абышлося без страт. Доля хваёвых лясоў у параўнанні з сярэдзінай ХХ стагоддзя знізілася з 58 да 48 адсоткаў. Гэта адчувальна, спатрэбіцца час для выпраўлення сітуацыі.

Караед-тыпограф цягам апошніх дзесяцігоддзяў сур'ёзна накінуўся на елку, што прывяло да ўсыхання гэтых дрэў у паўднёвых раёнах краіны і «міграцыі» яе на поўнач, за Менск. Фізічна яловыя лясы, вядома, нікуды не ўцяклі, проста на Палессі і суседніх раёнах яны засяляюцца невялікімі выспамі, дзе больш вільгаці.

Ёсць шкода ад клімату і супрацьлеглая: даволі шмат дзялянак лесу застаюцца падтопленымі на доўгі час, нягледзячы на агульную засушлівую пару. А гэта таксама небяспечна - карані не атрымліваюць дастаткова кіслароду, і дрэва гіне.