Што будзе з адлічэннямі ў Фонд сацабароны, калі памерці да выхаду на пенсію?

• 18.09.2024, 10:32

Або праз год пасля выхаду.

Чаканая працягласць жыцця ў Беларусі павялічваецца, але пакуль мужчыны агулам жывуць нашмат менш, чым жанчыны. Сярэднестатыстычны беларус атрымлівае пенсію блізу аднаго года пасля выхаду на заслужаны «адпачынак», піша «Зеркало». А што будзе з гэтымі грашыма ў выпадку смерці чалавека? Расказваем.

Сістэма не прадугледжвае перадачу пенсій у спадчыну

У Беларусі дзейнічае салідарная пенсійная сістэма. Гэта значыць, што адлічэнні на пенсійнае страхаванне, якія наймальнікі плацяць за работнікаў у ФСАН (гэта 28% ад заробку) і робіць сам работнік (гэта 1%), не назапашваюцца на будучыню гэтаму работніку, а выдаткоўваюцца на выплаты цяперашнім пенсіянерам. У вас таксама будуць браць грошы на пенсію са страхавых адлічэнняў працуючых. І так па коле.

У такой сістэме не прадугледжанае перадачу пенсіі ў спадчыну. І ўсё адно, у якім узросце памёр чалавек – за пару гадоў да выхаду на заслужаны «адпачынак» ці ж праз год.

Але ёсць нюанс: блізкія чалавека пасля яго смерці ўсё ж могуць разлічваць на невялікія выплаты (дарэчы, іх таксама называюць спадчыннымі). Размова ідзе аб сумах, якія ўжо налічылі, але не паспелі выдаць памерламу.

Разлічваць на такія выплаты могуць родзічы памерлага. Гэта муж (жонка), дзеці, бацькі, дзед, бабка, унукі, родныя браты і сёстры, усынавіцель ці ўсыноўлены. Належныя памерламу выплаты дзеляцца пароўну паміж усімі такімі родзічамі, якія пражывалі супольна з пенсіянерам у дзень смерці, калі яны падалі адпаведную заяву. Таксама на выплаты могуць разлічваць утрыманцы (нават калі не пражывалі з ім).

Але марудзіць з атрыманнем гэтых грошай не трэба. Звярнуцца па іх можна цягам шасці месяцаў з дня смерці пенсіянера. Калі чалавек пражываў адзін і ў яго не было непрацаздольных утрыманцаў, яго спадчыннікам неабходна звярнуцца да натарыуса, які выдасць пасведчанне аб праве на спадчыну на недаатрыманыя сумы пенсій. З гэтым сведчаннем спадчыннікі змогуць атрымаць грошы.

«Другую» пенсію можа атрымаць спадчыннік

У нашай краіне ёсць добраахвотнае страхаванне дадатковай пенсіі. Так, можна альбо самастойна аформіць такі поліс, альбо з дапамогай наймальніка – паводле схемы «3+3».

Адкрыцці дэпутата: людзям мала дзяржпенсіі, каб «атрымліваць асалоду ад жыцця». Улады прапануюць, як развязаць праблему, але насельніцтва ігнаруе

Вось гэтыя назапашванні праз страхавыя кампаніі могуць пераходзіць у спадчыну, гэта значыць, яго блізкія маюць права прэтэндаваць на гэтыя назапашванні, але за вылікам выдаткаў страхавой кампаніі.

У гэтым выпадку спадчыннікам трэба звярнуцца да натарыуса, які выдасць пасведчанне аб праве на спадчыну, пасля чаго яны змогуць атрымаць тыя выплаты, на якія мелі права сваякі памерлага.

«Назапашванні па страхаванні дадатковай пенсіі перадаюцца ў спадчыну паводле закона. Акрамя гэтага, вы можаце аформіць завяшчанне з указаннем, хто мае права атрымаць сродкі пасля смерці, - тлумачыць кампанія «Стравіта». — Таксама калі чалавек выйшаў на пенсію, але праз нейкі час пайшоў з жыцця, усё, што належыць яму паводле дамовы, спадчыннікі таксама атрымаюць».