Украіна і хаўруснікі распрацавалі канцэпцыю спецыяльнага трыбунала супраць РФ

• 18.09.2024, 19:01

Украінцы чакаюць аднаўлення справядлівасці.

У сераду, 18 верасня, у Вене адбылася сустрэча Core Group па стварэнні спецыяльнага трыбунала што да злачыннай агрэсіі РФ супраць Украіны.

Пра гэта паведамляе Офіс прэзідэнта Украіны.

У прэс-службе адзначылі, што па выніках працы ўдзельнікі дасягнулі згоды наконт агульнай канцэпцыі стварэння спецтрыбунала.

Намесніца кіраўніка Офіса прэзідэнта Украіны Ірына Мудрая адзначыла, што гэтае пасяджэнне «стала ключавым» для вызначэння мадэлі трыбунала, які будзе створаны пагадненнем з Радай Еўропы. Удзельнікі сустрэчы перайшлі ад агульных пытанняў фармату спецтрыбунала да абмеркавання праекта яго статута.

«Украінцы чакаюць аднаўлення справядлівасці. Мы не можам дазволіць сабе марудзіць. Стварэнне гэтага спецыяльнага трыбунала з'яўляецца маральным абавязкам для ўсяго свету. Бо гаворка ідзе не толькі аб Украіне. Гаворка ідзе пра будучыню міжнароднага права, вяршэнства права і глабальнага свету», - падкрэсліла яна.

Усяго ў сустрэчы ўзяла ўдзел 41 дэлегацыя. Усе яны пацвердзілі, што вінаватыя ў злачынстве агрэсіі супраць Украіны будуць прыцягнутыя да адказнасці, а таксама вызначылі наступныя крокі па стварэнні спецтрыбунала.