ДАІ абвясціла рэйды па ўсёй Беларусі

• 19.09.2024, 11:22

«Асаблівую ўвагу» паабяцалі не толькі кіроўцам.

МУС Беларусі абвясціла аб правядзенні "прафілактычных мерапрыемстваў" з 19 да 24 верасня. "Асаблівую ўвагу" паабяцалі надаць усім удзельнікам дарожнага руху, і асабліва - увечары, бо з надыходам восені колькасць ДТЗ павялічваецца.

Так, у сувязі са скарачэннем светлавога дня ДАІ запланавала правесці рэйды "для гарантавання бяспекі" ўразлівых удзельнікаў дарожнага руху. Асаблівую ўвагу праваахоўнікі надумалі звярнуць на папярэджанне ДТЗ увечары, паведамілі ў прэс-службе ведамства.

У МУС падкрэслілі, што правядзенне рэйдаў для адпрацоўкі найбольш аварыйна-небяспечных адцінкаў дарог і пешаходных пераходаў запланаванае з прыцягненнем да адказнасці ўсіх, хто парушае ПДР. Размова ідзе аб веласіпедыстах, пешаходах і кіроўцах, якія "ігнаруюць захаванне хуткасных рэжымаў і правілаў праезду пераходаў".

На што звярнуць увагу кіроўцам і пешаходам?

У ДАІ звярнулі ўвагу, што зараз кіроўцам трэба пераходзіць на новыя ўмовы на дарогах і праявіць "гранічную ўважлівасць" з-за скарачэння светлавога дня. Ім рэкамендавалі наступнае:

• выбіраць бяспечную хуткасць руху,

• улічваць варункі надвор'я і бачнасць,

• узмацняць увагу пры праездзе небяспечных адцінкаў паблізу ад лясных масіваў.

Далі свае рэкамендацыі ў Дзяржаўтаінспекцыі і пешаходам:

• перасякаць праезную частку выключна ва ўстаноўленых месцах,

• перад тым, як пераходзіць дарогу, пераканацца ў тым, што кіроўцы вас заўважылі і прапускаюць,

• уночы насціь святлоадбіўныя элементы.