Зяленскі наведае на наступным тыдні ЗША

• 19.09.2024, 20:39

Прэзідэнт Украіны сустрэнецца з Байдэнам, Гарыс і Трампам.

Прэзідэнт Украіны Уладзімір Зяленскі на наступным тыдні наведае Злучаныя Штаты Амерыкі. Там у яго запланаваны шэраг сустрэчаў і выступ у ААН.

Пра гэта паведамляе Офіс прэзідэнта Украіны.

Паводле звестак ОП, Зяленскі выступіць на Генеральнай Асамблеі ААН. Ён сустрэнецца з прадстаўнікамі амерыканскіх абаронных і энэргетычных кампаній, а таксама з украінскай супольнасцю. Правядзе двухбаковыя перамовы з лідарамі краінаў і міжнародных арганізацый.

Таксама ў Зяленскага запланаваная сустрэча з прэзідэнтам ЗША Джо Байдэнам, дзе ён прапануе план перамогі. Зяленскі плануе абмеркаваць дэталі гэтага плану, а таксама падтрымку з боку Злучаных Штатаў у барацьбе Украіны дзеля свабоды.

«Уладзімір Зяленскі таксама плануе сустрэчы з віцэ-прэзідэнткай ЗША Камалай Гарыс, прадстаўнікамі Кангрэса Злучаных Штатаў ад абедзвюх партый і 45-м Прэзідэнтам ЗША Дональдам Трампам», – сказана ў паведамленні.