Z-спявак Шаман адказаў, чаму «расейскі патрыёт» карыстаецца амерыканскімі тэлефонамі і нямецкімі аўтамабілямі

• 29.09.2024, 19:48

Не абышлося без Дастаеўскага.

Вядомы расейскі Z-спявак Шаман (Яраслаў Дронаў) распавёў на расейскай тэлевізіі, як ён адказвае на папрокі ў тым, што ён, «расейскі патрыёт», ездзіць на нямецкім аўто, карыстаецца амерыканскім тэлефонам і іншымі заходнімі тэхналогіямі. Тлумачэнне выявілася нечаканым.

«Калі мне выстаўляюць некаторыя мае нядобразычліўцы, што, маўляў, як жа, ён жа расеец, а ў яго там, не ведаю, тэлефон амерыканскі, аўтамабіль нямецкі ці яшчэ што-небудзь у такім вось ключы.

А я адказваю. Вельмі проста. Мы ж не ведаем, а можа быць, стваральнікі гэтых амерыканскіх тэлефонаў, стваральнікі гэтых тэхналогій ці стваральнікі гэтых аўтамабіляў, ці стваральнікі яшчэ чагосьці, можа быць, яны натхняліся творамі Пятра Ілліча Чайкоўскага, калі стваралі гэты тэлефон, ці творамі Дастаеўскага ці Булгакава, якія вядомыя ва ўсім свеце.

Можа быць, без гэтых твораў увогуле гэтых тэхналогій і тэлефонаў не было б. Паспрабуйце проста падумаць аб гэтым. Мы ж не ведаем, як гэта было і чым людзі натхняліся», - растлумачыў Дронаў.